Zlatan Ibrahimovic er ekkert lamb að leika sér við en hann er á síðustu metrum ferilsins þessa stundina.

Zlatan var lengi einn besti sóknarmaður heims en hann lék með liðum eins og Ajax, Juventus, Inter Milan, AC Milan, PSG og Manchester United.

Svíinn er á mála hjá AC Milan í dag en hann er 41 árs gamall og kemur lítið við sögu þessa dagana.

Sóknarmaðurinn hefur ekki alltaf náð vel saman með liðsfélögum sínum og þá sérstaklega ekki Rafael van der Vaart sem lék með liðum eins og Real Madrid og Tottenham.

Hollendingurinn lék með Zlatan hjá Ajax í Hollandi og hefur heldur betur áhugaverða sögu að segja.

,,Já það er rétt [að hann hafi hótað að fótbrjóta mig] en Zlatan sagði þetta við marga,“ sagði Van der Vaart.

,,Það er líka rétt að hlutirnir gengu bara ekki upp á milli okkar en ég væri frekar til í að vera með einhverjum eins og honum í liði, sem er heiðarlegur, jafnvel þó rifrildi geti átt sér stað.“

,,Það voru hlutir sem áttu sér stað, það var ekkert eitt sem gerðist, við bara náðum ekki vel saman.“