Heimildaþættirnir um síðasta tímabil Arsenal á Amazon, All Or Nothing: Arsenal, vöktu mikla athygli. Þar var áhorfendum leyft að skyggnast á bak við tjöldin. Bernd Leno segir þó að ekki allt hafi verið raunverulegt sem þar kom fram.
Þættirnir fylgdu eftir síðustu leiktíð Arsenal. Fengu aðdáendur mikinn aðgang að því sem gekk á í klefanum og almennt á bak við tjöldin.
„Ég var þarna. Þetta var gaman fyrir stuðningsmennina og aðra að sjá allt. En ég verð að segja að þetta var ekki raunveruleikinn. Sumt var ekki 100% satt,“ segir Leno.
Þjóðverjinn yfirgaf Arsenal í sumar og hélt til Fulham eftir fjögur ár á Emirates-leikvanginum.
„Það voru mörg vandamál þetta tímabil með suma leikmenn og annað. Maður er inni í þessu og horfir svo á þættina og hugsar: Ég veit ekki alveg með þetta.“
Leno horfir björtum augum á tíma sinn hjá Arsenal.
„Ég átti fjögur frábær ár hjá Arsenal. Ég á enn marga vini í liðinu og átti frábært samband við stuðningsmenn. Jafnvel á erfiðu stundunum þá studdu þeir mig.
Þegar ég fer inn í borgina í dag koma margir stuðningsmenn Arsenal að mér og þakka mér fyrir þjónustuna til félagsins.“
