Knattspyrnumaðurinn Emil Pálsson, sem lagði nýverið skóna á hilluna eftir tvö hjartastopp á innan við sex mánuðum, settist í Íþróttavikuna með Benna Bó til að fara yfir fréttir vikunnar ásamt Herði Snævari Jónssyni íþróttastjóra Torgs.
Þeir félagar ræddu um sölu KA á markahæsta leikmanni Bestu deildarinnar, Nökkva Þeyr Þórissoni sem samdi við B-deildar liðið Beerschot í Belgíu. Benedikt Bóas spurði hvort að það ætti ekki að miða hærra þegar verið væri að selja leikmenn erlendis?
„Ég held að þetta sé gott skref. Fyrsta deildin í Belgíu er trúlega svipað eða jafnvel betri en Skandinavía. Einhver lið betri og einhver verri en upp á spiltíma þá held ég að þetta sé gott skref,“ sagði Emil.
Hörður benti á að hann væri keyptur sem fyrsti kostur enda Beerschoot nýbúið að selja sinn framherja. „Ég held að aldurinn spili stóra rullu. Kristall er í kringum tvítugt en Nökkvi er 23 ára og verður 24. Það er himinn og haf þar á milli. Það munar á hvaða lið þú færð.
En ef hann stendur sig þarna þá er þetta stór gluggi. Stutt í næstu hillu fyrir ofan. Ef hann fær spilatíma í byrjun þá er þetta gott skref,“ sagði Hörður.
Emil benti á að hann sé nýbúinn að springa út sem leikmaður og að vera kominn í Belgíu sé mjög gott skref.