Í desember hófst rannsókn á Granit Xhaka, miðjumanni Arsenal, vegna hugsanlegs veðmálaskandals í tengslum við gult spjald sem hann fékk í sigri gegn Leeds í ensku úrvalsdeildinni á síðustu leiktíð.
Spjaldið fékk Xhaka fyrir tímasóun, sem er afar sérstakt, þar sem Arsenal var 1-4 yfir í leiknum.
Upphaflega var málið skoðað af enska knattspyrnusambandinu. Það var hins vegar fært á borð glæpastofunnar breska ríkisins síðar meir.
Nú segir Daily Mail frá því að rannsakendur í málinu hafi fengið veður af því að háum upphæðum hafi verið veðjað með rafmynt á mörkuðum sem flestir eru staðsettir í Albaníu.
Þá segir einnig í fréttinni að Alban Jusufi, sænsk-albanskur fyrrum leikmaður sem fékk fimm ára bann fyrir veðmálasvindl árið 2017, hafi veðjað háum upphæðum á að Xhaka fengi spjald í leiknum. Einnig er sagt frá því að albanska mafían gæti tengst málinu.
Arsenal vildi ekki tjá sig við Daily Mail um málið.