Íslenska kvennalandsliðið er í fjórtánda sæti á nýjum heimslista FIFA. Aldrei hefur liðið verið hærra á slíkum lista.
Ísland hoppar upp um þrjú sæti frá síðasta lista. Liðið tók þátt í lokakeppni Evrópumótsins á Englandi í síðasta mánuði. Þar stóð það sig vel, gerði jafntefli í öllum þremur leikjum riðilsins gegn Belgum, Ítölum og Frökkum. Það dugði þó ekki til að komast upp úr riðlakeppninni.
Besti árangur Íslands fyrir listann sem nú var gefinn út var fimmtánda sæti.
Bandaríska landsliðið er á toppi heimslistans sem stendur. Þar á eftir koma Þýskaland og Svíþjóð.
England, sem varð Evrópumeistari í fyrsta sinn á mótinu sem var að ljúka, er í fjórða sæti listans.