Mikel Arteta, stjóri Arsenal, vonast til að Pierre-Emerick Aubameyang fái góðar viðtökur á heimavelli Arsenal, mæti hann þangað í búningi Chelsea.
Aubameyang er sterklega orðaður við Chelsea þessa dagana. Félagið er í framherjaleit eftir að hafa losað sig við Romelu Lukaku og Timo Werner í sumar.
Gabonmaðurinn var áður á mála hjá Arsenal en fór til Barcelona í janúar. Töluvert fjaðrafok var í kringum leikmanninn við brottförina. Arteta hafði tekið af honum fyrirliðabandið og sett hann í agabann.
„Auba er stórkostlegur leikmaður. Hann gerði svo mikið fyrir okkur og við verðum að vera þakklát fyrir það,“ segir Arteta.
„Ég vona að hann fái góðar móttökur því hann á það skilið.“
Hann var spurður út í brotthvarf Aubameyang. „Stundum er stefna leikmannsins ekki í samræmi við stefnu félagsins.“
