Hallgrímur Jónasson, aðstoðarþjálfari KA mætti í viðtal til RÚV fyrir leik KA og Ægis í Mjólkurbikarnum í kvöld og var þar spurður út í leikbann Arnars Grétarssonar sem var í gær dæmdur í fimm leikja bann í kjölfar leiks KA og KR í Bestu deildinni á dögunum. Þess ber að geta að Arnar byrjar ekki að taka út leikbann sitt í kvöld, hann er því á hliðarlínunni í leik KA og Ægis.
Hallgrímur sagði að menn fyrir norðan séu ekki ánægðir með lengd bannsins sem Arnar fékk en hann kallaði Svein Arnarsson, fjórða dómara leiksins „fokking fávita“ og þá segist Fotbolti.net hafa heimildir fyrir því að leið Arnars og Sveins hafi legið saman degi eftir leik þar sem Arnar hafi „veist að“ Sveini.
,,Við erum ekki ánægðir með bannið,“ sagði Hallgrímur í samtali við RÚV. ,,Mér finnst þetta langt bann og KA ætlar að áfrýja því banni. Við erum ekki sáttir en sjáum hvernig fer.“
Aðspurður að því hvort hann viti hvort bannið tengist eingöngu leiknum sjálfum eða einnig atviki daginn eftir leik hafði Hallgrímur þetta að segja:
,,Ég er ekki með neitt staðfest en ég hef heyrt sögur af báðu. Ég held það sé best að KSÍ útskýri það eða KA þegar að því kemur.“