Það fóru fram fjórir leikir í Bestu deild karla í kvöld en síðustu tveimur var nú að ljúka.
Breiðablik hefur verið besta lið tímabilsins til þessa og var á toppnum með þriggja stiga forskot fyrir leik gegn Keflavík.
Keflvíkingar hafa þó verið á góðu skriði undanfarið og spilaði liðið glimrandi vel gegn toppliðinu í kvöld.
Omar Sowe kom Blikum yfir snemma leiks en Adam Árni Róbertsson jafnaði metin fyrir Keflavík og staðan jöfn í hálfleik.
Patrik Johannesen nýtti sér varnarmistök í byrjun seinni hálfleiks og tókst að koma heimaliðinu yfir á 48. mínútu.
Höskuldur Gunnlaugsson sá hins vegar um að jafna metin fyrir Blika en hann skoraði er níu mínútur voru eftir.
Fyrirliðinn var svo aftur á ferðinni á lokamínútu leiksins og tryggði Breiðablik sigur úr vítaspyrnu.
ÍA tapaði þá sannfærandi heima gegn Stjörnunni þar sem mark sumarsins var líklega skorað.
Ólafur Karl Finsen skoraði annað mark Stjörnunnar með frábærri bakfallspyrnu en hann gerði það undir lok fyrri hálfleiks í öruggum 3-0 sigri.
Keflavík 2 – 3 Breiðablik
0-1 Omar Sowe (’10)
1-1 Adam Árni Róbertsson (’27)
2-1 Patrik Johannesen (’48)
2-2 Höskuldur Gunnlaugsson (’81)
2-3 Höskuldur Gunnlaugsson (’91, víti)
ÍA 0 – 3 Stjarnan
0-1 Emil Atlason (‘5)
0-2 Ólafur Karl Finsen (’45)
0-3 Ísak Andri Sigurgeirsson (’75)