Ásgeir Sigurgeirsson hefur krotað undir nýjan samning við lið KA sem gildir til ársins 2025.
Þetta staðfesti KA nú í kvöld en liðið leikur í efstu deild, Bestu deildinni, og er Ásgeir mikilvægur hlekkur í liðinu.
Ásgeir er 25 ára gamall sóknarmaður og hefur leikið með KA undanfarin sex ár.
Tilkynning KA:
Ásgeir Sigurgeirsson fyrirliði KA í knattspyrnu skrifaði í dag undir nýjan samning við félagið sem gildir út árið 2025. Þetta eru stórkostlegar fréttir enda Geiri algjör lykilmaður í okkar liði og stórkostlegur karakter sem hefur átt mikinn þátt í uppgangi KA-liðsins undanfarin ár.
Ásgeir er 25 ára gamall framherji sem kom fyrst á láni til KA frá norska liðinu Stabæk sumarið 2016. Hann sló heldur betur í gegn er KA tryggði sér loksins sæti í efstu deild með sannfærandi sigri í Inkasso deildinni. Ásgeir skoraði 8 mörk það sumarið og þar á meðal sigurmarkið gegn Selfyssingum sem tryggði úrvalsdeildarsætið.
Í kjölfarið gekk Geiri endanlega til liðs við KA og hefur nú leikið 127 leiki í deild og bikar fyrir félagið og gert í þeim 33 mörk. Eins og fleiri leikmenn KA kemur Geiri frá Húsavík þar sem hann lék sína fyrstu meistaraflokksleiki fyrir Völsung sumarið 2012 aðeins 15 ára gamall. Þaðan gekk hann í raðir norska liðsins Stabæk þar sem hann dvaldi í tvö ár. Geiri er því þrátt fyrir ungan aldur kominn með ansi mikla reynslu í meistaraflokki.