Treyjunúmer Romelu Lukaku hjá Inter hefur vakið mikla athygli. Framherjinn mun spila í treyju númer 90 á Ítalíu.
Lukaku gekk aftur í raðir Inter á láni frá Chelsea á dögunum. Enska félagið eyddi hátt í 100 milljónum punda í leikmanninn síðasta sumar, hann kom einmitt frá Inter. Belginn stóð þó engan veginn undir væntingum á Brúnni og er allt annað en vinsæll á meðal stuðningsmanna Chelsea.
Ítalska félagið mun borga 6,9 milljónir punda fyrir lánið til að byrja með. Við það geta svo bæst 3,5 milljónir punda, endurheimti Inter Ítalíumeistaratitilinn af grönnum sínum í AC Milan.
Treyjunúmer Lukaku hefur, sem fyrr segir vakið mikla athygli. Hann var númer níu síðast þegar hann var hjá félaginu. Nú ber Edin Dzeko það númer.
Margir sáu sér leik á borði á samfélagsmiðlum eftir að treyjunúmer Lukaku var tilkynnt og grínuðust með að treyjunúmerið segi til um hversu mörgum milljónum punda Chelsea tapaði með kaupunum á framherjanum.