Rætt var um Lengjudeildina í þættinum Íþróttavikan með Benna Bó á Hringbraut í gærkvöldi en hún rúllar af stað á Hringbraut í seinna í dag með leik Gróttu og Vestra klukkan 14. Vestra er spáð misjöfnu gengi í deildinni í sumar en Tómas Þór Þórðarsson, formaður Samtaka íþróttafréttamanna telur að liðið eigi ekki að enda neðar en 6. sæti.
Heimili Lengjudeildarinnar verður á Hrinbraut í sumar. 22 leikir verða sýndir í beinni útsendingu á sjónvarpsstöðinni auk markaþáttar eftir hverja umferð.
,,Lengjudeildin fór af stað með tveimur frábærum leikjum á fimmtudaginn og í dag (laugardag) sýnum við leik Gróttu og Vestra í beinni útsendingu á Hringbraut. Þetta er landsbyggðadeild og við fylgjum henni vel eftir. Við munum sýna öll lið í beinni útsendingu í fyrri umferðinni og í seinni umferðinni handveljum við þetta betur eftir úrslitum og stöðu liða,“ sagði Hörður Snævar Jónsson, íþróttastjóri Torgs.
Vestra er spáð 7. sæti í spá fyrirliða og forráðamanna liða í Lengjudeildinni en liðið fékk stig í öllum sætum deildarinnar í spánni sem hlýtur að teljast einsdæmi.
,,Þetta er mjög sérstakt,“ sagði Tómas Þór Þórðarsson, formaður Samtaka íþróttafréttamanna ,,Vestri á að sjálfsögðu ekki að fá stig í sæti neðar en sex myndi maður hald. Liðið er afskaplega vel mannað þrátt fyrir að hafa lent í þessari óvæntu þjálfarabreytingu,“ en Gunnar Heiðar tók við stjórnartaumunum fyrir Vestan þegar að Jón Þór Hauksson hvarf á braut og tók við stöðu Jóhannesar Karls hjá ÍA.
,,KSÍ vantaði þjálfara og þá þurfti Skaginn að fá þjálfara og þetta endaði með því að Gunnar Heiðar tók við Vestra. Eitthvað segir mér að forráðamenn Vestra hafa sjálfir sett liðið neðar í sína spá til þess að koma smá pressu af sér. Vestramenn voru farnir að gæla við efstu sætin í fyrra og ef Jón Þór hefði mögulega tekið fyrr við hefði Vestri geta verið í ágætis séns í fyrra.“
Nánari umræðu um Lengjudeildina má sjá hér fyrir neðan.
