Ofreynsla og leikjaálag á hæsta stigi karlafótboltans setur heilsu leikmanna í hættu samkvæmt nýrri rannsókn.
Rannsóknin er birt nokkrum dögum áður en Mohamed Salah og Sadio Mane leika sjötugasta leik sinn á tímabilinu þegar Liverpool mætir Real Madrid úrslitum Meistaradeildarinnar á laugardaginn.
Alþjóðlegu leikmannasamtökin, Fifpro, hafa birt niðurstöður rannsóknar á rúmlega eitt þúsund knattspyrnumönnum og þjálfurum. Ennfremur varð gerð rannsókn á 265 leikmönnum sem tók mið af því hve margar mínútur leikmenn spiluðu, hversu langar vegalengdir þeir ferðuðust, og hvíld á milli leikja.
Niðurstöður sýna að 72 af 265 leikmönnum sem tóku þátt í rannsókninni spiluðu meira en 55 leiki tímabilið 2020-21, en það eru fleiri leikir en þjálfarar mældust til svo að leikmenn yrðu ekki í hættu. Leikmennirnir spiluðu einnig án þess að hljóta ráðlagða fimm daga hvíld milli leikja og 147 sinnum komu leikmenn við sögu í 10 eða fleiri leikjum í röð.
55% leikmanna sögðust hafa meiðst að minnsta kosti einu sinni vegna leikjaálags og 20% sögðust hafa meiðst mörgum sinnum. Aðeins 32% sögðust hafa fengið fjögurra vikna fríið sem mælt var með í lok leiktíðar 2020-21 og 76% sögðust sammála um að leikmenn þyrftu á meiri vernd að halda til þess að tryggja hvíldartímann.