Hjörtur Hermannsson og félagar í Pisa eiga enn möguleika á að leika í Serie A á næstu leiktíð eftir 2-1 tap gegn Monza í fyrri leik liðanna um laust sæti í efstu deild ítalska boltans í kvöld.

Hjörtur lék allan leikinn í vörninni. Danny Mota kom heimamönnum í Monza í forystu á níundu mínútu og Christian Gytkær virtist hafa farið langleiðina með að tryggja sínum mönnum sigur í einvíginu þegar hann skoraði annað mark Monza á 74. mínútu.

Filippo Berra hélt hins vegar lífi í einvíginu með því að minnka muninn í 2-1 á þriðju mínútu uppbótartíma.

Seinni úrslitaleikur liðanna fer fram á sunnudaginn á heimavelli Pisa sem þurfa að vinna með meira en einu marki til að leika í ítölsku úrvalsdeildinni á næstu leiktíð.