Gunnar Birgisson, íþróttafréttamaður hjá RÚV var gestur í Íþróttavikunni með Benna Bó, ásamt Herði Snævari Jónssyni, íþróttastjóra Torgs og þar var farið yfir víðan völl.

Þar var meðal annars fjallað um þann ósið sem gengur nú eins og faraldur um knattspyrnuheiminn þar sem tilhneigin í tengslum við stærstu knattspyrnumótin hefur verið að fjölga liðum.

Til að mynda á að fjölga liðum úr 32 upp í 48 lið á HM árið 2026 sem fer fram í Bandaríkjunum. Benedikt Bóas, þáttastjórnandi Íþróttavikunnar opnaði á umræðuna með því að spyrja hvort það væri ekki bara aðeins of mikið?

,,Því miður er það of mikið,“ svaraði Gunnar. ,,Við sjáum það bara á yfirstandandi HM að bilið á milli sterkustu og lökustu liðanna er of breitt. Auðvitað eiga sér stað svona óvænt úrslit eins og sigur Sádi-Arabíu á Argentínu en ég hugsa að ef sá leikur yrði spilaður hundrað sinnum, þá myndi Argentína vinna þann leik í 97% tilvika.“

Um sé að ræða þróun til hins verra.

,,En allt er breytingum háð og það má alveg láta reyna á þetta en einu áhyggjurnar sem ég hef af þessu móti er að þetta verði of mikið eins og handboltamót þar sem þú byrjar á því að sigta út slöku liðin, svo byrjar mótið.“

Sú sé ekki raunin á yfirstandandi HM.

,,Frá fyrsta leik skiptir allt máli. Leikirnir í þriðju umferð riðlakeppninnar sem við sáum á þessu heimsmeistaramóti, við munum aldrei sjá neitt þessu líkt aftur.“

Hörður Snævar tók þá við boltanum og sagði leiðinlegt að horfa upp á það í hvaða átt málin væru að þróast.

,,FIFA vill bara meiri peninga, það er bara verið að búa til meiri peninga með því að stækka allt. Við sjáum þetta líka hjá UEFA í tengslum við Meistaradeild Evrópu sem, með hverju árinu sem líður, verður bara leiðinlegri og leiðinlegri fram að jólum.

Ég er fótboltafíkill en er að mörgu leiti dottinn út úr því að nenna setjast fyrir framan sjónvarpið öll þriðju- og miðvikudagskvöld því um 90% leikjanna eru bara leiðinlegir.“

Þá sé Evrópumót karla í fótbolta orðið hundleiðinlegt framan af með fjölgun liða.

,,Það er svo mikið af slöppum liðum þarna inni. Við sáum Dani komast upp úr sínum riðli á síðasta móti með því að vinna einn leik, þrjú stig, vegna þess að liðið var til að mynda með Finnlandi og Rússlandi í riðli.

Heimsmeistaramótið er fullkomið með 32 lið en Evrópumótið á bara að vera með eins og það var.“

Á endanum hætti það að vera teljanlegt afrek að komast inn á stórmót.

Umræðuna í heild sinni má sjá hér fyrir neðan: