Mehran Sammak, 27 ára gamall Írani, var skotinn til bana af örygissveitum þar í landi, er hann fagnaði ósigri íranska landsliðsins gegn Bandaríkjunum á Heimsmeistaramótinu í Katar.
Það er fjallað um þetta í öllum helstu miðlum erlendis.
Mótmælaalda hefur verið í Íran undanfarið og hefur landsliðið sýnt henni stuðning. Leikmönnum og fjölskyldum þeirra var hótað pyntingum ef þeir höguðu sér ekki á HM, en þeir neituðu til að mynda að syngja þjóðsönginn.
Bandaríkin unnu leik liðanna í fyrrakvöld 1-0 með marki Christian Pulisic. Því fagnaði Sammak og var skotinn í höfuðið. Hann fagnaði með því að flauta á götum úti er hann sat í bíl sínum.
Samkvæmt fréttum neita yfirvöld í Íran að láta lík Sammak af hendi. Fjölskylda hans hélt jarðarför samt sem áður en án jarðsetningar.