Öster í Svíþjóð hefur staðfest að Rúnar Þór Sigurgeirsson gangi í raðir félagsins í janúar. Hann kemur frítt frá Keflavík.

Öster hefur lengi haft augastað á Rúnari og lét til skara skríða nú þegar samningur hans var á enda.

Rúnar er 22 ára gamall bakvörður sem hefur átt fína spretti með Keflavík í Bestu deildinni.

Srdjan Tufegdzic er þjálfari liðsins en hann þjálfaði KA og Grindavík hér á landi, hann varð síðan aðstoðarþjálfari Vals áður en hann tók við Öster í vor.

Keflavík er að verða fyrir mikilli blóðtöku þessa dagana en Rúnar fer til Svíþjóðar og Sindri Kristinn Ólafsson samdi við FH í gær.