Davíð Þór Viðarsson, yfirmaður knattspyrnumála hjá FH kveðst svekktur horfa á eftir Matthíasi Vilhjálmssyni í raðir Víkings. Þessi 35 ára gamli framherji gerði tveggja ára samning við Víking í gær.

Matthías er 35 ára gamall en eftir níu ár í atvinnumennsku snéri hann heim í FH fyrir tímabilið 2021. Hann ákvað að semja við bikarmeistarana eftir erfitt sumar í Kaplakrika.

„Þetta kom okkur á óvart, við vissum auðvitað að samningurinn hans var að renna út um áramótin. Við vorum vongóður um að hann myndi framlengja samninginn um eitt ár. Honum stóð það til boða, þetta voru vonbrigði,“ segir Davíð Þór í samtali við 433.is en samningur Matta við FH rennur út um áramót.

Davíð og aðrir í kringum FH vonuðust að Matthías myndi halda áfram að taka slaginn með félaginu sem hann hefur sterk tengsl við.

„Við vorum vongóður um að Matti yrði áfram, ég talaði við hann eftir tímabilið og Heimir hafði talað við hann og hitt hann. Það var aldrei neitt þannig að við töldum að þetta væri komið. Orðrómurinn um Víking hafði verið í fjölmiðlum en það er ekki fyrr en í fyrradag sem við vitum af þeim formlega.“

„Matt var frábær leikmaður fyrir FH áður en hann fór út og þessi tvö ár eftir heimkomu er ekki hægt að kvarta undan framlagi hans. Hann lagði sig alltaf 100 prósent fram en það gekk bara illa hjá liðinu þennan tíma.“

Davíð segir að það sé þó hægt sé að líta á björtu hliðarnar. „Við höfum verið að tala um að það yrðu breytingar, við þurfum bara að horfa á þetta jákvæðum augum. Þetta er tækifæri fyrir okkur og Heimi að móta hópinn eftir sínu höfðu. Við erum fullvissir um það að þegar mótið hefst í apríl þá mætum við til leiks með sterkt lið, sem mun gera góða hluti.“

„Við erum alveg með netið úti og erum að leita að styrkingu en við ætlum ekki að ræða um einstaka leikmenn eins og sumrir aðrir. Sumt er komið ákveðið langt og annað aðeins styttra. Við munum styrkja okkar lið.“