Stefán Árni Pálsson íþróttafréttamaður á Stöð2 Sport og blaðamaður á Vísi var gestur í íþróttavikunni hjá Benna Bó á Hringbraut á föstudagskvöld. Með honum var Hörður Snævar Jónsson fréttastjóri íþrótta hjá miðlum Torgs.
Hákon Arnar Haraldsson var ein af hetjum vikunnar en frammistaða hans í Meistaradeild Evrópu var mögnuð.
Hákon skoraði gegn Dortmund í vikunni en þessi 19 ára Skagamaður er að þjóta hratt upp stjörnuhimininn.
„Frábært mark, flottur punktur frá Freysa (Freyr Alexandersson) um að hann sé besti pressu senter í Skandinavíu. Hann virðist ekkert hafa fyrir þessu, hann skautar um völlinn,“ sagði Hörður.
Stefán Árni Pálsson tók þá til máls. „Hann fiskar rautt gegn Manchester City, frábær í þeim leik. Þetta er hrikalega duglegur leikmaður.“
„Hann er nánast okkar skærasta stjarna,“ sagði Benedikt.
Umræða um þetta er hér að neðan.
