Steven Gerrard, knattspyrnustjóri Aston Villa og fyrrum lærisveinn Rafa Benitez hjá Liverpool, viðurkennir að það hafi komið sér á óvart þegar að tilkynnt var um ráðningu Everton á knattspyrnustjóranum Rafa Benitez í fyrra.
Benitez er fyrrum knattspyrnustjóri Liverpool og stýrði liðinu meðal annars til sigurs í Meistaradeild Evrópu. Hann tók við erkifjendum Liverpool, Everton í fyrra við litla hrifningu stuðningsmanna Liverpool en hefur nú verið sagt upp störfum.
,,Ég finn tel með honum núna vegna þess að við eigum gott samband og ég ber mikla virðingu fyrir honum en ég verð að vera hreinskilinn. Það kom mér mjög á óvart þegar að hann var ráðinn til Everton,“ sagði Gerrard á blaðamannafundi í dag en Aston Villa heimsækir Everton í ensku úrvalsdeildinni um helgina.
,,Ég var undrandi og sjokkeraður þegar að Rafa vildi fara og taka við Everton bara miðað við hans arfleifð og orðspor hjá Liverpool. Þetta gekk ekki upp hjá honum,“ sagði Gerrard.
Duncan Ferguson, aðstoðarmaður Rafa og goðsögn í sögu Everton var ráðinn inn sem bráðabirgðastjóri í vikunni og Gerrard segir sína menn þurfa að vera á tánum um helgina því að andrúmsloftið á Goodison Park verði rafmagnað.
,,Duncan hefur tekið við og það er alveg augljóst hvernig móttökur hann mun fá. Við þurfum að vera tilbúnir,“ sagði Steven Gerrard, knattspyrnustjóri Aston Villa á blaðamannafundi í morgun.