Roy Keane, fyrrum leikmaður Manchester United og núverandi sérfræðingur Sky Sports, vill að næsti knattspyrnustjóri Manchester United fari í miklar hreinsanir á leikmannahópi liðsins.
United gerði 2-2 jafntefli við Aston Villa í ensku úrvalsdeildinni um nýliðna helgi. Liðið glutraði niður tveggja marka forystu en gengið hefur ekki verið upp á marga fiska hjá Manchester United á tímabilinu.
Eftir leikinn gegn Aston Villa var Keane spurður að því í myndveri Sky Sports, hversu mörgum leikmönnum hann myndi halda hjá Manchester United, væri hann knattspyrnustjóri liðsins.
Leikmennirnir sem voru nefndir á nafn voru Bruno Fernandes, Cristiano Ronaldo og Raphael Varane. ,,Síðan eru nokkrir góðir ungir leikmenn þarna,“ sagði Roy Keane hjá Sky Sports.
Keane segir augljóst að sóknarmaður félagsins, Marcus Rashford, sé í miklum vandræðum. Hann vill að félagið stígi inn í aðstæðurnar og hjálpi leikmanninum. ,,Hann hefur gert frábæra hluti síðastliðin ár bæði innan og utan vallar en það er eitthvað mikið að.“
,,Þetta gerist stundum hjá ungum leikmönnum og tengist sjálfstrausti, það sem gæti verið að valda þessu gæti verið hvað sem er, allt frá hlutum utan vallar til hluta innan vallar. Félagið verður að hjálpa honum í þessum aðstæðum. Þá verða reyndari leikmenn liðsins einnig að hjálpa ungu leikmönnunum. Það er margt að hjá Manchester United um þessar mundir, hlutir sem verður að laga,“ sagði Roy Keane, fyrrum leikmaður Manchester United og núverandi sérfræðingur Sky Sports.
Enski boltinn á 433 er í boði 
