Til umræðu var í útvarpsþættinum Fótbolta.net hverjir væru á blaði Arnars Þórs Viðarssonar um að taka við sem aðstoðarþjálfari. Arnar leitar að eftirmanni Eiðs Smára Guðjohnsen.

Elvar Geir Magnússon ritstjóri Fótbolta.net sagðist hafa heimildir fyrir því að Jóhannes Karl Guðjónsson væri á blaði en einnig voru Brynjar Björn Gunnarsson og Ólafur Ingi Skúlason nefndir til leiks.

Jóhannes Karl hefur svo slegið það út af borðinu að hann taki við sem aðstoðarþjálfari landsliðsins. „Nei ég er bara fókuseraður á þetta verkefni á Skaganum,“ segir Jói Kalli við Fótbolta.net.

Arnar Þór hefur sagt að þrír Íslendingar sem eru í starfi séu efstir á blaði en Jóhannes karl er þjálfari ÍA og Brynjar Björn er þjálfari Hk, þá er Ólafur Ingi þjálfari U19 ára liðs karla.