Graham Potter, nýr stjóri Chelsea, er himinnlifandi með fyrstu daga sína í starfi.

Potter yfirgaf Brighton á dögunum til að taka við Chelsea, í kjölfar þess að Thomas Tuchel var rekinn frá Lundúnaliðinu.

Chelsea leikur sinn fyrsta leik undir stjórn Potter annað kvöld er liðið tekur á móti RB Salzburg í riðlakeppni Meistaradeildar Evrópu.

„Það eru níu dagar en þetta hefur liðið eins og níu vikur eða jafnvel mánuðir,“ segir Potter um tímann síðan hann tók við.

„Þetta er það fallega við fótboltann og lífið. Maður veit aldrei hvað bíður handan við hornið.“

Honum líst virkilega vel á samstarfið við Todd Boehly og eigendur Chelsea.

„Ég hef rætt mikið við eigendurna og áttaði mig á því að þetta er gott og klárt fólk sem hefur náð frábærum árangri í lífinu, líka utan fótboltans. Þetta er spennandi verkefni og þeir eru með spennandi hugmyndir um hvernig félagið getur tekið næsta skref.“

„Þetta hafa verið annasamir dagar, að yfirgefa Brighton, hitta leikmennina og kynnast þeim. Þetta hefur samt verið mjög gott hingað til.“