Knattspyrnudeild Breiðabliks hefur gert breytingar á á skipulagi og skipuriti deildarinnar. Markmið breytinganna er að einfalda og skýra skipulag, boðleiðir og stjórnun. Eyjólfur Héðinsson verður yfirmaður knattspyrnumála.

„Með þessum breytingum, sem samþykktar voru af stjórn í byrjun desember, verður lögð enn frekari áhersla á faglegt starf deildarinnar, allt frá yngstu flokkunum og upp í meistaraflokka félagsins, og skýra framtíðarsýn. Staða deildarstjóra meistaraflokka og barna- og unglingastarf sameinast í rekstrarstjóra knattspyrnudeildar og til verður ný staða yfirmanns knattspyrnumála,“ segir á vef Breiðabliks.

Eyjólfur Héðinsson, verður yfirmaður knattspyrnumála, og ber hann ábyrgð á faglegu starfi deildarinnar, og leiðir fótboltalegar áherslur og stefnumörkun. Eyjólfur hefur starfað hjá Breiðablik frá árinu 2022 og var fyrstu árin í meistaraflokksteymi karlaliðsins. Hann tók síðan við stöðu deildarstjóra meistaraflokka árið 2024.

Ísleifur Gissurarson , verður rekstarstjóri knattspyrnudeildar, og ber ábyrgð á daglegum rekstri meistaraflokka og barna- og unglingastarfs og tengdum verkefnum. Ísleifur hefur starfað á skrifstofu Breiðabliks sem deildarstjóri barna- og unglingastarfs frá árinu 2021.