Það er alls ekki útséð með framtíð Cristiano Ronaldo, þó svo að hann hafi spilað fyrstu tvo leiki Manchester United í ensku úrvalsdeildinni á tímabilinu.
Ronaldo hefur verið orðaður burt frá Manchester United í allt sumar. Portúgalinn vill spila í Meistaradeild Evrópu, eitthvað sem United getur ekki boðið honum eftir vonbrigði á síðustu leiktíð.
Ronaldo hefur verið orðaður við fjölda stórliða um allan heim en ekkert þeirra virðist til í að taka sénsinn á honum.
Ítalski blaðamaðurinn Fabrizio Romano segir frá því í dag að Jorge Mendes, umboðsmaður Ronaldo, sé enn að vinna í því að finna lausn fyrir leikmanninn.
Svo gæti farið að Ronaldo yfirgefi United rétt fyrir lok félagaskiptagluggans.
Romano segir það fyrsta kost Ronaldo að komast í burtu frá United. Félagið segir hann þó ekki til sölu.
United hefur byrjað tímabilið afleitlega. Liðið tapaði 1-2 gegn Brighton í fyrstu umferð og um helgina tapaði það 4-0 gegn Brentford.
Ronaldo byrjaði leikinn gegn Brentford en kom inn af bekknum gegn Brighton.