Kristján Óli Sigurðsson sagði frá því í Þungavigtinni í gær að fjármálavandræði væru í Úlfarsárdal hjá knattspyrnuliði Fram.
Fram hefur komið nær öllum knattspyrnuáhugamönnum á óvart í sumar. Flestir sparkspekingar spáðu þeim falli en liðið er í áttunda sæti með nítján stig, níu stigum frá fallsæti.
Ef marka má orð Kristjáns Óla eru þó vandræði á bak við tjöldin.
„Það er smá vesen fjárhagslega og það verða hræringar í teymi meistaraflokksins eftir tímabil. Það verður einhverjum skipt út. Menn eiga inni laun, fá ekki sjúkrakostnað greiddann,“ segir Kristján Óli.
„Þeir eru búnir að gera vel á vellinum og búa til alvöru heimavöll í þessum dal, en það þarf að borga launin.“
Kristján Óli hvetur stuðningsmenn til að leggja hönd á plóg. „Framarar eiga marga ríka og góða stuðningsmenn og ég hvet þá bara til að millifæra svo menn geti gert upp.“
Sigurður Hrannar Björnsson, sem var formaður knattspyrnudeildar Fram þar til fyrr í sumar, fór á Twitter í gær og svaraði Kristjáni Óla. Sá hafði þá hafði birt skjáskot af spjalli við fyrrum leikmann Fram, sem sagðist hafa slitið hásin er hann var á mála hjá félaginu og þurft að greiða allan sjúkrakostnað sjálfur. „Eru þið lens á umfjöllunarefni mikli Höfðingi? Allt greitt í okkar stjórnartíð. Þú getur sagt vini þínum að hafa beint samband við mig ef hann telur sig eiga inni greiðslur, það verður afgreitt,“ skrifar Sigurður.
Eru þið lens á umfjöllunarefni mikli Höfðingi? Allt greitt í okkar stjórnartíð. Þú getur sagt vini þínum að hafa beint samband við mig ef hann telur sig eiga inni greiðslur, það verður afgreitt. https://t.co/Sbj8FihSaJ
— Sigurdur Hrannar (@sigurdurhb) August 12, 2022
Kristján Óli svaraði þá Sigurði. „Nóg að gera. En við öflum heimilda og vöndum okkur. En flott að hreinsa upp launagreiðslur í gær. Gangi ykkur vel og haldið áfram að skemmta landanum með flottum fótbolta,“ og ýjar að því að Fram hafi borgað óuppgerð laun deginum áður.
Sömuleiðis, gaman að hlusta á ykkur félagana.
— Sigurdur Hrannar (@sigurdurhb) August 12, 2022