Gerard Pique, leikmaður Barcelona, mun taka á sig aðra launalækkun áður en tímabilið á Spáni hefst.
Barcelona er í vandræðum með að skrá leikmenn til leiks fyrir nýtt tímabil en liðið verður að fara eftir reglum spænsku deildarinnar.
Barcelona byrjar tímabilið gegn Rayo Vallecano á laugardag en gæti þar verið án leikmanna á borð við Raphinha og Robert Lewandowski sem komu í sumar.
Samkvæmt Athletic ætlar Pique að samþykkja aðra launalækkun á Nou Camp til að hjálpa félaginu í að fara eftir reglum deildarinnar.
Pique mun enn verða samningsbundinn til ársins 2024 en hann hafði nú þegar sætt sig við launalækkun er fjárhagsvandræði liðsins komu upp á yfirborðið.
Pique elskar Barcelona og það sem félagið stendur fyrir og hefur leikið þar frá árinu 2008 og er einnig uppalinn hjá spænsku risunum.