Raheem Sterling verður leikmaður Chelsea á næstu leiktíð og vonast til að komast með liðinu til Bandaríkjanna eftir helgi.
David Ornstein hjá the Athletic greinir frá þessu í kvöld en Chelsea hefur náð samkomulagi við Manchester City um kaupverð.
Ornstein segir að Chelsea borgi 47,5 milljónir punda fyrir Sterling sem skrifar undir fimm ára samning.
Sterling er 27 ára gamall kantmaður og ef allt gengur vel fyrir sig kemst hann með Chelsea til Bandaríkjanna í æfingaferð.
Sterling hefur lengi verið öflugt vopn í sókn Man City og spilaði áður með Liverpool.
Samkvæmt Mirror þá var Liverpool óvænt að skoða það að fá Sterling aftur og reyndi að hafa betur í baráttunni við Chelsea.
Sterling er ekki vinsæll á meðal stuðningsmanna Liverpool en hann reyndi allt til að komast til Man City fyrir 50 milljónir punda árið 2015.
Mirror heldur því þó fram að endurkoma hafi verið í kortunum og að Liverpool hafi spurst fyrir um leikmanninn.
