Lucas Paqueta vill komast frá West Ham og aftur heim til Brasilíu. Það verður þó ekki ódýrt að fá hann.

Hinn 28 ára gamli Paqueta var einnig orðaður burt frá Hömrunum í fyrra, þá til Aston Villa, en hélt hann kyrru fyrir.

Nú er áhuginn hins vegar frá Brasilíu og er Flamengo einna helst nefnt til sögunnar. Er það einmitt uppeldisfélag Paqueta.

Paqueta er lykilmaður hjá West Ham og brasilískir miðlar segja Lundúnaliðið ekki taka það í mál að selja hann ódýrt.

Hefur það sett 42,5 milljóna punda verðmiða á hann að þeirra sögn og má leikmaðurinn þá helst ekki fara fyrr en í sumar.

Framtíð Paqueta gæti skýrst á næstu dögum, en hann er samningsbundinn West Ham í eitt og hálft ár til viðbótar.

Auk West Ham og Flamengo hefur Paqueta spilað með AC Milan og Lyon á ferlinum, en hann hefur verið á Englandi síðan 2022. Varð hann Sambandsdeildarmeistari með West Ham vorið 2023.