N’Golo Kante gæti verið á leið aftur í evrópska boltann, en tyrkneska stórliðið Fenerbahce hefur sýnt honum mikinn áhuga nú þegar aðeins sex mánuðir eru eftir af samningi hans við Al-Ittihad í Sádi-Arabíu.

Samkvæmt franska miðlinum L’Équipe hefur Kante ekki enn samþykkt nýjan samning við Al-Ittihad, sem opnar dyrnar fyrir félagaskiptum. Fenerbahce vill ekki bíða fram á sumar heldur reynir að landa heimsmeistaranum strax í janúarglugganum og er tilbúið að greiða félagi hans hóflegt kaupverð.

Kante, sem er 34 ára, er einn sigursælasti miðjumaður sinnar kynslóðar og hefur unnið nánast alla titla sem í boði eru, þar á meðal HM með Frökkum, Meistaradeildina og enska meistaratitilinn með Chelsea. Hefur hann haldið uppteknum hætti í Sádí og verið meðal bestu manna þar.

Al-Ittihad vill halda Kante og hefur boðið honum nýjan samning, en samkvæmt fréttum hefur hann ekki viljað skrifa undir. Talið er að von um að vera í franska landsliðshópnum á HM næsta sumir gæti spilað inn í.