Það var illa mætt á Hlíðarenda í gær þegar Valur vann nauman 2-1 sigur á Leikni Reykjavík í Bestu deild karla.

Valur var að vinna sinn annan leik í röð. Stuðningsmenn virðast þó hafa takmarkaðan áhuga á karlaliði sínu um þessar mundir sem hefur heilt yfir valdið vonbrigðum á leiktíðinni. Valur er í fjórða sæti með 19 stig eftir tíu umferðir, átta stigum á eftir toppliði Breiðabliks.

Samkvæmt vef KSÍ voru 581 manns mættur á Hlíðarenda í gær. Miðað við meðfylgjandi mynd er þó óhætt að segja að það líti ekki út fyrir að hafa verð svo margt á leiknum.

Þetta var rætt í hlaðvarpsþættinum Dr. Football í gær. „Stuðningsmenn Vals hafa sagt takk en nei takk. Mætingin engin. Þeir ætla ekki að láta bjóða sér upp á þetta,“ sagði Hjörvar Hafliðason, þáttastjórnandi. „En liðið er komið upp í fjórða sæti, með sex sigra og þrjú töp,“ bætti hann við.