Eiður Smári Guðjohnsen tók við sem þjálfari FH í fyrradag eftir brottvísun Ólafs Jóhannessonar og Sigurbjörns Hreiðarssonar. Mál félagsins voru rædd í Stúkunni á Stöð 2 Sport í gær.

Baldur Sigurðsson, fyrrum leikmaður FH, auk Stjörnunnar, KR og fleiri félaga, var einn af sérfræðingum þáttarins í gær. Hann segir að nú þegar nýr þjálfari sé kominn inn þurfi leikmenn einnig að axla ábyrgð á slæmu gengi liðsins á leiktíðinni. FH er í níunda sæti með aðeins átta stig eftir níu leiki.

„Leikmenn þurfa að sýna alveg jafnmikla ábyrgð, ná líka upp samstöðu innan liðsins því utan frá séð virðist hún ekki hafa verið sérstök í sumar,“ sagði Baldur.

„Ég spilaði með mörgum af þessum leikmönnum og margir af þeim eru hálfgerðir bezzerwizzerar. Og þeir þurfa bara að breyta því, fara að hlusta og vilja taka leik sinn upp á næsta stig.“

Baldur segir leikmenn liðsins hafa gæðin til að gera betur en að menn verði að sýna þau. „Gæðin eru til staðar. Þetta eru allt frábærir fótboltamenn. Það er alltaf umræðan þegar þú talar um FH. En þá þurfa þeir líka að sýna þessi gæði á öllum sviðum fótboltans.“

„Þeir þurfa að sýna félaginu og stuðningsmönnum að þeir séu virkilega að spila með FH-hjartanu sem þú þarft að vera með ef þú ætlar að spila fyrir þetta lið.“