Albert Brynjar Ingason gagnrýnir skiptingarnar sem Arnar Þór Viðarsson, þjálfari karlalandsliðs Íslands, gerði gegn Ísrael í Þjóðadeildinni í gær.

Leiknum lauk 2-2. Jón Dagur Þorsteinsson og Þórir Jóhann Helgason skoruðu mörk Íslands. Liðið komst tvisvar yfir í leiknum.

Arnar gerði fimm skiptingar í leiknum en þá fimmtu gerði hann í blálokin þegar Albert Guðmunsson kom inn á fyrir Þóri Jóhann. Arnar gerði fyrst tvöfalda skiptingu eftir klukkutíma leik þegar Ísak Bergmann Jóhannesson og Sveinn Aron Guðjohnsen komu inn á fyrir Aron Sigurðsson og Andra Lucas Guðjohnsen. Ísak kom út á hægri kantinn sem er ekki hans ákjósanlega staða. Þá var Sveinn Aron arfaslakur eftir að hann kom inn á og gerði lítið sem ekkert.

Arnar gerði aðra tvöfalda skiptingu þegar rúmar tíu mínútur lifðu leiks. Þá komu þeir Aron Elís Þrándarsson og Stefán Teitur Þórðarson inn á fyrir Birki Bjarnason og Jón Dag Þorsteinsson. Á þessum tímapunkti voru fimm miðjumenn inn á vellinum á sama tíma.

„Þessar skiptingar, allar, fannst mér spes,“ sagði Albert Brynjar í hlaðvarpsþættinum Dr. Football.

„Í seinna hollinu, þeir eru búnir að jafna. Þar skil ég ekki af hverju þú setur ekki Albert þá inn og færir þá Ísak niður á miðju. Við erum að reyna að sækja til sigurs og þetta var bara fullt af miðjumönnum.“