Tveimur leikjum er nýlokið í 8-liða úrslitum Mjólkurbikars karla. Ansi óvænt úrslit urðu í öðrum leiknum.
Vestri 2-1 Valur
Vestri gerði sér lítið fyrir og sló stórlið Vals úr leik á heimavelli sínum.
Fyrri hálfleikur var fremur jafn. Heimamenn stóðu í Íslandsmeisturunum og gott betur. Það var þó Valur sem komst yfir með marki Tryggva Hrafns Haraldssonar á 34. mínútu. Hann skoraði þá eftir fyrirgjöf Birkis Más Sævarssonar.
Rétt fyrir hálfleik tókst heimamönnum að jafna. Þar var að verki Chechu Meneses með mark beint úr aukaspyrnu.
Eftir rúman stundarfjórðung í seinni hálfleik komst Vestri yfir. Þá skoraði Martin Montipo.
Í lok leiks fékk Patrick Pedersen, framherji Vals, beint rautt spjald fyrir að slá til leikmanns Vestra. Gestirnir lögðu allt kapp á sóknarleik í lokin en allt kom fyrir ekki.
Vestri fer mjög óvænt í undanúrslit eftir 2-1 sigur á Valsmönnum. Það er spurning hvað þetta þýðir fyrir Heimi Guðjónsson, þjálfara Vals. Hann hefur legið undir gagnrýni vegna slaks árangurs í deildinni.
ÍR 1-3 ÍA
ÍA vann endurkomu sigur gegn ÍR í Breiðholtinu.
Pétur Hrafn Friðriksson kom heimamönnum yfir á 17. mínútu með skallamarki.
Rétt fyrir hálfleik jafnaði Þórður Þorsteinn Þórðarson metin fyrir Skagamenn.
Eftir um tíu mínútur í seinni hálfleik kom Gísli Laxdal Unnarsson gestunum svo yfir með góðu skoti.
Í uppbótartíma innsiglaði Guðmundur Tyrfingsson 1-3 sigur ÍA. Þeir fara í undanúrslit.