Kjaftasögurnar um Heimi Hallgrímsson og framtíð hans í þjálfun hafa verið á milli tannana á fólki síðustu daga og vikur. Heimir lét af störfum sem þjálfari Al-Arabi í Katar á dögunum.
Heimir er eitt af óskabörnum þjóðarinnar eftir árangur sinn sem þjálfari íslenska landsliðsins, fyrst á Evrópumótinu í Frakklandi árið 2016 með Lars Lagerback og síðan var hann einn með liðið sem fór á Heimsmeistaramótið í Rússlandi árið 2018.
Heimir hefur síðan þá starfað í Katar en kaus að róa á önnur mið eftir tvö og hálft ár í starfi hjá Al-Arabi.
433.is hefur fengið nokkrar ábendingar í dag um að Heimir hafi sést í Kaupmannahöfn í morgun, var hann þar á leið í tengiflug samkvæmt heimildarmanni 433.is.
433.is hefur svo fengið það staðfest að Heimir sé á leið til Katar en það er aðeins til þess að pakka í töskur og ganga frá íbúðinni sem hann hafði á meðan hann stýrði Al-Arabi.
Óvíst er hvaða skref Heimir tekur á þjálfaraferli sínum en kjaftasögur hafa verið á kreiki um áhuga liða í Katar, í Sviss og í fleiri löndum á þessum eftirsótta þjálfara.
Ljóst er að hann mun ekki hafa Freyr Alexandersson sem aðstoðarmann áfram en Freyr réð sig til starfa hjá Lyngby í dag.