Viðar Örn Kjartansson landsliðsmaður í knattspyrnu og leikmaður Vålerenga í Noregi lagði til fjármuni svo að uppeldisfélagið hans, Selfoss gæti samið við enska framherjann Gary Martin. Frá þessu er greint á Vísir.is.
Selfoss samdi við Gary Martin fyrir viku síðan eftir að ÍBV hafði rekið hann burt eftir agabrot. Fjársterkir aðilar á Selfossi söfnuðu saman fjármunum svo Selfoss gæti samið við Gary Martin.
„Landsliðsmaðurinn og Selfyssingurinn Viðar Örn Kjartansson er einn þeirra sem sáu til þess að Selfoss yrði næsti áfangastaður Martins,“ segir í frétt á Vísir.is en þar kemur fram að 6-8 aðilar hafi komið með fjármuni inn í verkefnið.
Selfoss samdi við Gary Martin út tímabilið 2022 en hann hefur verið einn allra besti framherji íslenska fótboltans síðustu árin. Gary hefur spilað með ÍA, KR, Víkingi, Val og síðast ÍBV.
Fyrsti leikur hans fyrir Selfoss verður á morgun gegn Vestra í Lengjudeildinni. „Það voru allir mjög jákvæðir að bæta aðeins í og hjálpa til út af þessu. Það sýnir samstöðuna í bæjarfélaginu og hjá okkar stuðningsmönnum, sem eru tilbúnir að koma að borðinu þegar þess þarf. Við gefum hins vegar ekkert upp hverjir það eru,“ sagði Jón S. Sveinsson, formaður knattspyrnudeildar Selfoss.
