Samkvæmt fréttum í Danmörku var Arnar Þór Viðarsson landsliðsþjálfari Íslands á dögunum í viðræðum við OB um að taka við þjálfun liðsins. Arnar er að auki yfirmaður knattspyrnumála hjá KSÍ.
Frá þessu var greint í dönskum fjölmiðlum í dag. Þar segir að Arnar hafi komið til greina sem þjálfari liðsins og viðræður hafi átt sér stað.
Í fréttum í Danmörku segir að það hafi komið til tals að Arnar myndi stýra bæði OB og íslenska landsliðinu en Jens Gustafsson frá Svíþjóð er einnig sagður hafa verið í viðræðum um starfið. Arnar Þór gerðist landsliðsþjálfari undir lok síðasta árs en hann ásamt Eiði Smára Guðjohnsen og Lars Lagerback velja í dag hóp sinn fyrir komandi æfingaleiki.
Guðmundur Benediktsson íþróttafréttamaður hjá Sýn skrifar um málið á Twitter og er hugsi yfir málinu. „ Landsliðsþjálfari Íslands, yfirmaður knattspyrnumála hjá KSÍ og í viðræðum við OB í Danmörku um að þjálfa liðið?,“ skrifar Guðmundur á Twitter.
Hann kastar svo fram þeirri spurningu hvort KSÍ hafi gefið grænt ljós á viðræðurnar. „Á ég að trúa því að KSÍ hafi gefið grænt ljós á þetta?,“ skrifar Guðmundur.