Marcus Rashford framherji Manchester United hefur stigið fram og mótmælt eigendum félagsins sem ætla að fara inn í ný stofnaða Ofurdeild. Glazer fjölskyldan á Manchester United en hún kemur frá Bandaríkjunum og hefur alltaf verið umdeild.
Rashford fer einfalda leið í því að mótmæla því plani sem nú er í gangi um tólf stór félög sem ætla að fara í sína eigin deild til að fá meiri fjármuni.
„Fótboltinn er ekkert án stuðningsmanna,“ stendur á myndinni sem Rashford birtir en um er að ræða orð sem Sir Matt Busby fyrrum stjóri liðsins lét falla. Um er að ræða skilaboð sem eru í stúkunni á Old Trafford.
Neyðarfundur var í herbúðum Manchester United en leikmenn voru ósáttir við Ed Woodward stjórnarformann félagsins, leikmenn mótmæltu þessu plani.
— Marcus Rashford MBE (@MarcusRashford) April 20, 2021
12 evrópsk stórlið á knattspyrnusviðinu tilkynntu seint á sunnudagskvöld að þau hafi tekið saman höndum um stofnun Ofurdeildar, The Super League. UEFA er alfarið á móti þessu og hótaði í gær að útiloka liðin og leikmenn þeirra frá þátttöku í öllum mótum á alþjóðasviðinu. Þá hafa knattspyrnusamböndin í Englandi, Spáni og á Ítalíu hótað að reka liðin úr deildarkeppnunum þar í landi. Markmiðið með deildinni er að til verði keppni þar sem 15 lið eiga alltaf fast sæti en árlega fái 5 önnur lið aðgang að keppninni.
Þessi nýja deild hefur mætt mikilli mótspyrnu en svo virðist sem félögin ætli að standa fast á sínu og hefja leik í deildinni sem allra fyrst.
Stofnfélög deildarinnar eru:
Arsenal
Chelsea
Liverpool
Manchester City
Manchester United
Tottenham
Atlético Madrid
Barcelona
Real Madrid
AC Milan
Inter Milan
Juventus.