Erling Haaland framherji Borussia Dortmund er ansi líklegur til þess að yfirgefa félagið í sumar. Ef Dortmund selur Haaland ekki í sumar verður hann á útsöluverði sumarið 2022.
Dortmund vonast til þess að selja Haaland fyrir um 150 milljónir punda í sumar, Manchester City, Manchester United, Real Madrid, PSG og fleiri lið skoða stöðuna.
Sergio Aguero, markahæsti leikmaðurinn í sögu Manchester City mun yfirgefa félagið í sumar. Samningur hans við félagið rennur þá út og hann verður ekki framlengdur. Það er ljóst að Aguero mun skilja eftir sig stórt skarð hjá Manchester City og að ekki verður auðvelt að feta í hans fótspor hjá félaginu.
City vill fá Haaland í sumar en ensk blöð segja í dag að Haaland vilji 600 þúsund pund í laun á viku. Hann vill vera launahæsti leikmaður deildarinnar.
Aðeins PSG gæti keppt við Manchester City og United um slík laun samkvæmt fréttum en spænsku liðin upplifa fjárhagserfiðleika.
Heildarpakkinn með því að fá Haaland væri því vel yfir 300 milljónir punda eða 52 milljarðar fyrir fimm ára samning við hann.