Sjónvarpsþáttur 433 verður á dagskrá Hringbrautar og á vefnum í kvöld klukkan 21:30. Rúnar Kristinsson þjálfari KR mætir og ræðir gang mála í Vesturbænum.

Birgir Jóhannsson framkvæmdarstjóri ÍTF ræðir við okkur um sjónvarpsmál og þá verður Emil Hallfreðsson leikmaður Padova í beinni línu frá Ítalíu.

Emil sem er 36 ára gamall hefur verið í frábæru formi með Padova í þriðju efstu deild á Ítalíu, Padova er í efsta sæti deildarinnar og virðist á leið upp í næst efstu deild.

Emil var til fjölda ára algjör lykilmaður í íslenska landsliðinu. Hann missti sæti sitt í hópnum í október á síðasta ári þegar Erik Hamren var enn þjálfari liðsins. „Ég datt út þarna fyrir umspilsleikina og Erik Hamren hringdi þó í mig og útskýrði fyrir mér að hann ætlaði ekki að velja mig í það verkefni, ég bar mikla virðingu fyrir því. Ég var í verkefninu áður, sem var leikur í Þjóðadeildinni gegn Belgíu og kom inn þar. Ég var valinn í það verkefni eftir nánast ekkert undirbúningstímabil, var ný búinn með eins og hálfan mánuð í sumarfríi. Maður hefði viljað vera í betra formi,“ sagði Emil.

Emil var ekki valinn í hóp Arnars Þórs Viðarssonar sem nú er í verkefni, Emil fékk ekkert símtal frá þjálfaranum og sárnar það örlítið.

„Ég hef spilað fullt af leikjum síðan þá, ég hef ekki heyrt í einum né neinum hvað það varðar. Ég er ekki hættur, ef þeir munu áfram velja mig þá mæti ég. Það er alltaf heiður að vera valinn, eftir að hafa verið í landsliðinu í einhver 16 ár þá hefði maður kannski búist við að heyra frá Arnari. Ég þekki hann nokkuð vel, síðan ég var lítll strákur. Bara að fá hvort maður sé inni eða úti, það hefði verið gaman að fá að heyra aðeins í honum.“