Þremur leikjum var að ljúka í ensku úrvalsdeildinni rétt í þessu. Liverpool fór létt með Everton, Chelsea náði sigri gegn Watford og Manchester City hafði betur gegn Aston Villa.
Everton tók á móti Liverpool í alvöru nágrannaslag. Liverpool byrjaði leikinn frábærlega og sáu leikmenn Everton ekki til sólar fyrstu tuttugu mínúturnar. Jordan Henderson kom Liverpool yfir á 9. mínútu og Mohamed Salah tvöfaldaði forystuna tíu mínútum síðar. Eftir annað markið var meira jafnræði á milli liðanna og minnkaði Demaral Gray muninn. Gestirnir komu ákveðnir í seinni hálfleikinn og skoraði Salah þriðja markið eftir frábæran sprett og Diogo Jota skoraði það fjórða með frábæru skoti.
Watford tók á móti Chelsea. Hræðilegt atvik átti sér stað á 12. mínútu leiksins er stuðningsmaður hneig niður og fór í hjartastopp. Leikurinn var því stöðvaður í rúman hálftíma. Endurlífgun bar árangur og var leikurinn flautaður aftur í gang. Mason Mount kom Chelsea yfir á 29. mínútu en leikmenn Watford voru seigir og jöfnuðu undir lok fyrri hálfleiks. Hakim Ziyech kom gestunum aftur yfir á 73. mínútu eftir stoðsendingu frá Mason Mount og þar við sat og 1-2 sigur Chelsea staðreynd.
Loks tók Aston Villa á móti Manchester City. Ruben Dias kom Manchester City yfir þegar tæpur hálftími var liðinn af leiknum. Bernando Silva tvöfaldaði forystuna undir lok fyrri hálfleiks. Ollie Watkins minnkaði muninn í byrjun seinni hálfleiks en lengra komust lærisveinar Steven Gerrard ekki.
Everton 1 – 4 Liverpool
0-1 Jordan Henderson (´9)
0-2 Mohamed Salah (´19)
1-2 Demaral Gray (´38)
1-3 Mohamed Salah (´64)
1-4 Diogo Jota (´79)
Watford 1 -2 Chelsea
0-1 Mason Mount (´29)
1-1 Emmanuel Dennis (´43)
1-2 Hakim Ziyech (´73)
Aston Villa 1 – 2 Manchester City
0-1 Ruben Dias (´27)
0-2 Bernardo Silva (´43)
1-2 Ollie Watkins (´47)