Líklegast þykir að Michael Carrick muni stýra Manchester United í heimaleik liðsins gegn Arsenal í ensku úrvalsdeildinni á fimmtudaginn.
Ralf Ragnick var í gær staðfestur sem bráðabirgðastjóri Manchester United út yfirstandandi tímabil en umsókn hans um atvinnuleyfi í Bretlandi hefur ekki verið samþykkt eins og staðan er núna.
Á meðan það er staðan má Ragnick ekki byrja að vinna með leikmönnum Manchester United.
Samkvæmt heimildum Sky Sports mun Carrick stýra Manchester United á fimmtudaginn.
Rangnick hefur áður verið knattspyrnustjóri liða á borð við Hannover, Schalke, Hoffenheim og Red Bull Leipzig.
Þá stýrði hann einnig lítt þekktu liði Ulm upp í þýsku úrvalsdeildina í fyrsta skipti í sögu félagsins. Þá hefur hann einnig gegnt stöðu yfirmanns knattspyrnumála hjá Red Bull Salzburg og Red Bull Leipzig á sínum ferli við góðan orðstír.
Ragnick tekur við Manchester United í 8. sæti ensku úrvalsdeildarinnar. Þar situr liðið með 18 stig eftir þrettán umferðir. Þá er liðið einnig búið að tryggja sér sæti í 16-liða úrslitum Meistaradeildar Evrópu.