Forráðamenn Manchester United íhuga það nú alvarlega að reka Ole Gunnar Solskjær, knattspyrnustjóra liðsins, úr starfi eftir dapurt gengi undanfarið. Þetta herma heimildir Manchester Evening News en toppar félagsins munu funda og taka ákvörðun um næstu skref.
Upp hafa sprottið háværar raddir þess efnis að Solskjær verði rekinn en Manchester United beið afhroð gegn erkifjendum sínum í Liverpool er liðin mættust á heimavelli Manchester United, Old Trafford í gær. Leiknum lauk með 5-0 sigri Liverpool.
Leikmenn Manchester United eru ekki á skipulagðri æfingu í dag, heldur fengu þeir hvíldardag. Liðið mætir Tottenham um næstu helgi og á framundan erfitt leikjaprógram.
Heimildir Manchester Evening News herma að stjórnin íhugi það alvarlega að reka Norðmanninn úr stöðu knattspyrnustjóra.
Gengi Manchester United á tímabilinu hefur verið undir væntingum. Miklum fjárhæðum var eytt til leikmannakaupa fyrir tímabilið en United situr í 7. sæti ensku úrvalsdeildarinnar um þessar mundir.