Liverpool goðsögnin Graeme Souness hefur varað sinn fyrrum klúbb um að sofa ekki á verðinum og gera hvað sem er til þess að fá Salah til þess að skrifa undir nýjan samning við félagið.

Forráðamenn Liverpool voru duglegir við það í sumar að gera samninga við lykilleikmenn en ekki náðist samningur við Salah. Hann á aðeins 18 mánuði eftir á samning og virðist nú vera óvissa um framtíð hans.

Salah hefur byrjað tímabilið af miklum krafti en hann hefur skorað 12 mörk í 11 leikjum hingað til. Hann sagði sjálfur í viðtali á dögunum að hann vill enda ferilinn hjá Liverpool. Souness telur að Liverpool verði að ná nýjum samningi við kappann.

„Hann hefur verið besti leikmaður í heimi á þessu tímabili. Hann er líklega einn gráðugasti leikmaður sem ég hef séð, flest stóru nöfnin hafa þann eiginleika en hann er ótrúlega sjálfselskur,“ sagði Souness í dálki sínum fyrir The Sunday Times.

„Hann skýtur úr hvaða færi sem er en leikmennirnir sætta sig við það því hann er svo góður.“

„Mér er alveg sama hvað hann biður um, Liverpool á að gefa honum það sem hann vill. Það er félaginu fyrir bestu að halda honum.“

Enski boltinn á 433 er í boði