David Beckham verður andlit Heimsmeistaramótsins í knattspyrnu í Qatar sem fer fram í lok árs 2022. Þetta verður formlega tilkynnt í næsta mánuði og mun kappinn græða vel á þessu verkefni.
Talið er að Beckham muni ekki aðeins verða andlit Heimsmeistaramótsins heldur muni hann vera svokallaður sendiherra fyrir Qatar næstu tíu árin. Hann mun þéna vel en samkvæmt frétt Mirror fær hann um 15 milljónir punda á ári næstu tíu árin.
Beckham hefur eytt þónokkrum tíma í Qatar síðustu daga og vikur þar sem hann hefur kynnst landi og þjóð og undirbúið sig fyrir verkefnið.
Enn er það mjög umdeild að Heimsmeistarakeppnin verði haldin í Qatar og hefur verið síðan það var ákveðið fyrir tíu árum. Landið hefur verið harðlega gagnrýnt fyrir mannréttindabrot og skoðanir gagnvart LGBTQ+ samfélaginu. Beckham á þó að hafa fengið loforð um að landið ætli sér að taka á þessum málum.