Lengi hefur verið rifist um hvort að Cristiano Ronaldo eða Lionel Messi sé besti leikmaður í sögu fótboltans. Nýlega hefur Mohamed Salah verið með í umræðunni en hann hefur byrjað tímabilið með Liverpool af krafti.

Mohamed Salah hefur skorað 12 mörk í 11 leikjum í öllum keppnum fyrir Liverpool á þessu tímabili og sagði Jurgen Klopp að hann væri besti leikmaður í heimi í þessu formi.

„Hver er betri en hann? Við þurfum ekki að tala um hvað Messi og Ronaldo hafa gert fyrir fótboltann en akkúrat núna er Salah bestur,“ sagði Klopp í viðtali eftir 5-0 sigur Liverpool gegn Watford.

Erkifjendurnir Liverpool og Manchester United mætast um helgina og Klopp fann sig knúinn til þess að útskýra þessi ummæli betur.

„Afhverju þurfum við að bera þá saman, þeir eru báðir heimsklassa leikmenn. Vinstri fótur Salah er líklega betri en Ronaldo er betri í loftinu og með betri hægri fót. Báðir eru fljótir og elska að skora mörk.“

Salah og Ronaldo eru báðir tilnefndir til Ballon d´or þetta árið og eins og áður sagði þá mætast þeir á sunnudag.