Davíð Örn Atlason varnarmaður Breiðabliks er að öllum líkindum á leið aftur í Víking eftir erfitt ár í Kópavogi. Breiðablik borgaði fleiri milljónir fyrir Davíð síðasta tímabil.

Davíð kom meiddur til Breiðabliks og komst aldrei í gang. Þegar Davíð hafði náð heilsu hafði Óskar Hrafn Þorvaldsson náð að búa til frábæran bakvörð úr Höskuldi Gunnlaugssyni.

Breiðablik og Víkingur voru að keppast um sigur í efstu deild karla. Breiðablik missteig sig undir restina og Víkingur tók þann stóra. Víkingur varð svo bikarmeistari um síðustu helgi þar sem Davíð Örn var mættur í stúkuna að styðja Víkinga.

„Dr. Football samfélagið er mjög öflugt. Þeir skipta sér oft af málum sem þeir eiga ekki að skipta sér af, ég fékk ábendingar um að Davíð Atlason hefði mætt með Víkingum á bikarúrslitin gegn Skaganum. Pirrar Hafliðason ekki neitt,“ sagði Hjörvar Hafliðason stjórnandi Dr. Football um málið í gær.

Hjörvar segir hins vegar að hegðun Davíðs sé taktlaus nú þegar hann reynir að losna frá Blikum. „Ég átta mig á því að það er taktlaust. Ég var fyrirliði Breiðabliks 2006 og þá var ég ekki að mæta á HK leiki, þá er maður ekki að bögga lið sem er óþarfi að bögga þegar maður er leikmaður. Ég get skilið hann eða Blika sem eru ósáttir,“ sagði Hjörvar.

Hrafnkell Freyr Ágústsson lagði þá orð í belg um málið. „Þetta er liðið sem var í samkeppni við Breiðablik um titilinn,“ sagði Kötturinn Keli.