Víkingur Reykjavík er bikarmeistari í knattspyrnu árið 2021. Liðið vann góðan sigur á ÍA í úrslitaleiknum á Laugardalsvelli í dag. LIðið vann 3-0 sigur á Skagamönnum.

Leikurinn á Laugardalsvelli var mikil skemmtun, bæði innan vallar og í stúkunni. Víkingur tók völdin snemma leiks og á 18 mínútu var það Erlingur Agnarsson sem opnaði markareikninginn.

Undir lok fyrri hálfleiks var svo komið að Kára Árnasyni. Honum tókst að skalla knöttinn í netið af stuttu færi. Um var að ræða síðasta leik Kára á ferlinum en hann og Sölvi Geir Ottesen hafa nú lagt skóna á hilluna.

Síðari hálfleikurinn var nokkuð fjörlegur en það var eki fyrr en í uppbótartíma sem Helgi Guðjónsson innsiglaði 3-0 sigur liðsins.

Víkingur er fimmta félagið sem vinnur bæði Íslands og bikarmeistaratitil á sama ári. KR og ÍA hafa fjórum sinnum unnið þetta einstaka afrek.

ÍBV hefur einu seinni afrekað það og sömu sögu er að segja um Val. Víkingur hefur svo bæst við þennan fámenna hóp eftir daginn í dag.

Víkingur var ríkjandi bikarmeistari fyrir leikinn en liðið vann bikarinn árið 2019. Ekki var leikið til þrauta í bikarnum á síðasta ári vegna kórónuveirunnar.