Argentíski knattspyrnusnillingurinn Lionel Messi verður ekki með Paris Saint-Germain gegn Montpellier um helgina vegna hnémeiðsla sem hafa verið að hrjá hann. Hann gæti einnig misst af leik gegn Manchester City í riðlakeppni Meistaradeildar Evrópu á þriðjudag.
Messi var fjarverandi vegna meiðslanna í sigurleik PSG gegn Metz í frönsku Ligue 1 á miðvikudag.
Í dag gat hann byrjað að skokka aftur en ekki tekið þátt á æfingu PSG að fullu. Staðan verður tekin á honum aftur á sunnudag. Þá kemur væntanlega í ljós hvort Messi verði með þegar Parísarliðið tekur á móti Englandsmeisturum Man City í næstu viku.
Eins og flestir þekkja þá kom hinn 34 ára gamli Messi til PSG í sumar eftir að hafa leikið allan sinn atvinnumannaferil með Barcelona.
Það hefur gengið illa hjá honum í fyrstu leikjunum í Frakklandi. Argentínumaðurinn á enn eftir að skora eða leggja upp í þremur leikjum í deild og Meistaradeild.