Kolbeinn Tumi Daðason fréttastjóri á Vísir.is skrifar ítarlega grein um málefni KSÍ og landsliðsmanna í knattspyrnu sem verið hafa í brennidepli síðustu vikur.
Stjórn KSÍ situr nú á neyðarfundi samkvæmt útvarpsþætti Fótbolta.net. Guðni Bergsson formaður KSÍ hefur fengið að finna fyrir því á samfélagsmiðlum eftir að Þórhildur Gyða Arnardóttir steig fram í fréttum RÚV í gær og greindi frá því að árið 2017 hafi þekktur landsliðsmaður áreitt hana kynferðislega og ráðist svo á hana, og sagði að Guðna og KSÍ hafi verið vel kunnugt um málið.
Fréttastofa RÚV ræddi aftur við Guðna í gær í ljósi frásagnar Þórhildar og spurði hvernig stæði á því að hann hafi í gær sagt að engin tilkynning hafi borist sambandinu um kynferðisbrot landsliðsmanna.
Umræddur landsliðsmaður greiddi Þórhildi bætur vegna málsins og segir í frétt Vísis. „Haustið og veturinn 2017 var sú saga á vörum margra að umræddur leikmaður væri sakaður um ofbeldi gegn tveimur konum. Árásirnar áttu að hafa verið gerðar að næturlagi á skemmtistaðnum B5 sem þá var í Bankastræti og einkar vinsæll meðal ungu kynslóðarinnar,“ skrifar Kolbeinn Tumi.
Á Vísi kemur fram að Þórhildur hafi fengið nokkrar milljónir í sinn vasa í miskabætur, önnur kona flaug erlendis með Þórhildi þar sem þær hittu umræddan landsliðsmann í knattspyrnu. Hann baðst afsökunar og borgaði þeim miskabætur vegna málsins.
Þórhildur hélt því fram á RÚV í gær að lögfræðingar KSÍ hefðu reynt að þagga niður í sér en lögmennirnir Almar Möller og Hörður Felix Harðarson hafna því. „ Lögmennirnir staðfesta báðir við fréttastofu að þeir hafi gætt hagsmuna leikmannsins en ekki KSÍ,“ segir í frétt Vísis.
Vísir fjallar í sömu frétt um málefni Gylfa Þórs Sigurðssonar sem er frjáls ferða sinna í Bretlandi gegn tryggingu á meðan rannsókn fer fram. Gylfa er gefið að sök að hafa framið kynferðisbrot gegn stúlku undir lögaldri.
„Engin yfirlýsing hefur komið frá Gylfa, umboðsmanni hans eða fjölskyldu. Er þess beðið að rannsókn bresku lögreglunnar ljúki. Samkvæmt upplýsingum fréttastofu eiga meint samskipti Gylfa við unga konu, sem lögregla hefur til rannsóknar, að hafa átt sér stað árið 2017,“ skrifar Kolbeinn Tumi á Vísir.is um málefni Gylfa.
Samkvæmt frétt Kolbeins eru fleiri sögur sem beinast að ofbeldi landsliðsmanna, þannig eru tveir landsliðsmenn sakaðir um nauðgun á konu fyrir tíu árum síðan. Einnig skrifar Kolbeinn Tumi. „Ótaldar eru frásagnir af landsliðsmönnum sem eiga að hafa beitt stafrænu kynferðisofbeldi með dreifingu nektarmynda, eru sakaðir um heimilisofbeldi eða að gangast ekki við börnum sínum. Sögur sem eiga það sameiginlegt með fyrrnefndum sögum að hafa flogið hátt en enginn þolandi stigið fram, enn.“
