Máni Pétursson, útvarpsmaður á X-inu 977, er umboðsmaður Óla Kalla og var gestur í hlaðvarpinu FantasyGandalf á dögunum. Þar sagði hann frá því hvers vegna Óli Kalli fór frá Stjörnunni. „Í apríl 2017 hringir Ólafur Karl Finsen í mig og tilkynnir mér að ég eigi að finna handa honum nýtt lið, Íslandsmótið var þarna ekki hafið og samningur hans að renna út um haustið. Hann segist ekki ætla að sitjast niður með Stjörnumönnum og ekki ræða neitt meir við þá,“ segir Máni í FantasyGandalf en Fótbolti.net vekur athygli á sögunni.
„Það kemur til út af því að ungur leikmaður Stjörnumaður, Ágúst Leó Björnsson, þá okkar besti leikmaður í 2. flokki og mikill markaskorari, frábær leikmaður sem hafði verið markahæstur þrjú ár í 2. flokki skorandi tuttugu mörk. Hann fótbrotnar illa í ágúst 2016 og allt snýst um að komast í æfingaferð með Stjörnunni til að sýna sig og sanna. Hann æfir eins og brjálaður maður og heldur sér gangandi á þessu.“
Máni segir að Ágústi hafi verið tilkynnt að það væri ekki pláss fyrir hann í æfingaferðinni, einungis viku fyrir brottför, og að hann megi finna sér nýtt lið. „Mikið högg fyrir ungan leikmann þá nítján ára,“ segir Máni. „Hann verður beygður af þessu og fyrsti maðurinn sem tekur á móti honum er Ólafur Karl Finsen. Ágúst segir við Óla Kalla hvað hafði gerst. Ólafur Karl gjörsamlega tjúllaðist, hringir í mig og tilkynnir að hann muni fara frá þessu liði. Hann líður ekki framkomu Stjörnumanna við uppalinn leikmann.“